WOW TSADA!

WOW TSADA O Dios nga ikaw namuhat sa among mga lakaw ngadto sa Davao. Kalipay hilabihan kay Ikaw kanamo nag-uban sa among pag-uli dri sa Cagayan. Pagkabuotan ba gayod Nimo, langitnong Amahan, kay kami kanunay Imong giubanan! Walay pulong arang malitok aron isaysay ang tinuod nga hulagway sa akong kinasuloran nga tugob sa kalipay tungod sa pabor nga akong nadawat, dili maihap, gikan Kanimo, akong Magbubuhat!

WOW TSADA sa daghang butang akong nakat-onan gikan sa Sunog Mindanao 5 (G12 Conference) didto sa Davao. Bisan kami (akong asawa-Vivian, Pastor Fajardo sa pagadian, ug Pastor Lother sa kapatagan) wala gyod sa conference makahuman, apan ang among nakat-onan daku na kaayo ug ikatabang sa among pagdumala sa simbahan! “WOW Factor” ang usa sa gitudlo didto ni Bishop Oriel Ballano nga dili gayod nako malimtan. Ang punto kon unsaon nga ang mga bisita panahon sa simba makaingon, “WOW” tungod sa ipakita nga pag-abi-abi ug pagtagad sa mga kauban sa simbahan! WOW! Wow na Wow gyod! Daghang Salamat Bishop Oriel Ballano! Ang imong tambag alang kanako maoy tubag aron ang bulohaton mapauswag!

WOW TSADA TCC (Tablon Community Church) sa inyong way puas nga suporta alang sa kalamboan sa atong iglesia! Bisan tuod ang uban kaninyo natingala mahitungod sa “Grasya” nga maoy atong basihanan sa tanan tang kalihokan! Daw sa pagkakaron dili kini masabtan, apan sa kaulahian matugkad ra nato ning tanan!

WOW TSADA tan-awon ang usa ka Cristohanon nga magbuhat sa bulohaton tinukmod sa gugmang tim-os, dili pinugos. WOW TSADA kon ikaw sa imong Biblia mobasa aron tagbawon ang ikamatayng kagutom sa Balaang Pulong, ug dili buhat nga pinugos sama sa tawong masakiton nga nawad-an na sa gana nga mokaon nga sa iyang lider hadlokon aron mapugos pagkaon. WOW TSADA kon ikaw sa Dios mangaliya tungod sa kahinangop nga ikaw kanunay Niyang gihigugma, dili sa kalisang nga basin silotan kon ang pag-ampo malaktawan. WOW TSADA kon ikaw mosangyaw sa Maayong Balita nga sa mga tawo gipangita, dili tungod kay ikaw gikotahan sa gidaghanon sa mga tinun-an nga imong maatiman. WOW TSADA kon “COMPASSION” ang naghingapin sa imong kahiladman inigtan-aw mo sa katawhan, dili “COMPULSION” nga ang kauban sa simbahan sawayon ug tamayon kon sila dili pa makahimo sa bulohaton sa pagkakaron. WOW TSADA kon kita nahangawa sa alanihon nga ang ubang kauban sa simbahan wala mamahawa kay sila gilutos ug maayo sa ilang mga pangulo kay wala makatampo sa ani tungod kay aduna silay laing bulohaton nga kinahanglan gyod nilang unahon ug atimanon. WOW TSADA kon ang atong pagtan-aw sa tanang tawo pareha: kabos-dato; ulipon-agalon; maalam-walay alamag; ug uban pa! WOW TSADA kon ang atong pagsangyaw sa tanan koridason, dili pilipilion; ang mga dato palabihon samtang ang mga kabos pihigon. WOW TSADA kon kining tanan nga akong gihisgotan imong masabtan!

Dunay uban, dili pod nuon tanan, nagpatuo nga kunohay sa mga kalag intrisado apan gilutos nila ug maayo ang ilang mga disipolo ilabi na gayod sila nga daw wala magpakabana sa trabaho. Ang mga makasasala kabigon; ang taga simbahan abugon! Ang sinultihan daw maluluy-on pamation apan ang kasingkasing bagtik, kon dili man bagsik, kon imong tugkaron!

COMPASSION DILI CONDEMNATION!

Dinhi ra ko taman ug maayong adlaw sa tanan!